20'000 Johr Mais

Dr Mensch und d Affe, dasch bekannt,
sinn naturhistorisch äng verwandt.
Mir ähnle de Affe ganz gwaltig
im Usseh und in dr Haltig,
verhalte trotz Intelligänz uns primitiv
und sinn au schambar aggressiv,
denn wie d Primate trage mir halt
in unsre Gen dr Drang zur Gwalt.
Im Urwald gänn d Schimpanse
mit de Füscht sich uff e Ranze,
doch wil mir zivilisierter wänn syy als d Affe
dööte mir Mensche uns lieber mit Waffe.
In dr Staizyt, dasch wohr,
vor zwanzigtuusig Johr,
hänn mir scho mit Mammutknoche
unsre Gegner d Schädel broche
und mit Fuschtkail uss hartem Stai
e Zahn ussgschlage, oder au zwai.
Dangg dr Evolution hänn mir die alte
Verhaltenswyyse nit nur bhalte,
sondern si ganz ungeniert
uff humani Art modärnisiert.
Näbe de altbewährte Methode zem Morde
sinn neui Technike entwicklet worde,
und so massakriere mir hüt, s isch wunderbar,
au biologisch, chemisch und nuklear.
Öb Kind, Erwachsene oder Grais,
mir sueche immer Stryt und Mais,
denn ohni Lämpe, Krieg und Bluetvergiesse
könne s Läbe mir nit gniesse.
S ligt in dr menschlige Natur
und isch e Zaiche vo hoocher Kultur,
ass mir mit aller Art vo Waffe
uns bemiehe, klari Verhältnis z schaffe.
Statt philosophisch z debattiere
ischs effiziänter, dr Mitmensch z eliminiere,
denn wenn dä nümm läbt, das muesch seh,
het är au kai dummi Schnuure meh.
E Axt im Rugge isch am Änd
e wirklig schlagends Argumänt,
wo me im Ärnschtfall schlächt
widerlege ka mit Menscherächt,
Ethik, Gwüsse und Moral,
denn mit eme Beil im Nacke ischs normal,
ass d Diskussion, was bös isch und was guet,
e bitz aisytig verlaufe duet
und jede Versöhnigsversuech versandet,
wenn ain als Lyyche uff em Friidhof landet.
Wenn zwai sich stryte, freut sich dr Dritt,
sait s Sprichwort, doch das stimmt so nit,
oder jedefalls nit immer,
hüfig kunnts nämlig no schlimmer,
denn macht plötzlig dä Dritt
bi dr Schleegerei au sälber mit,
und kömme drzue no e baar Kollege,
wo sichs nit lang überlege,
denn isch, was als Zwaikampf isch gstartet,
bald zur Masseprüglete entartet.
Sinn aber die Strythähn, die rabiate,
nit Individue, sondern Staate,
denn kunnts zem Krieg, und das haisst,
ass d Gwalt d Nation jetzt zämmeschwaisst,
und s Kämpfe bis zem jüngschte Gricht
wird zur erschte Bürgerpflicht.
Mit Fahne und Fanfare,
zien die uniformierte Schare,
uffs Schlachtfäld, wo me si garantiert
verschiesst, in d Luft sprängt und komposchtiert,
und so ände die stolze Jünger
uff eme Acker denn als Dünger.
Au wenn dä Verluscht s Land entsetzt,
so wird är doch zimlig schnäll ersetzt,
denn e mänggi patriotischi Muetter
gebärt fürs Vaterland Kanonefuetter,
und die Gfallene kriege fürs Morde
posthum no e Dapferkaitsorde,
und Prieschter dien am Grab für sii bätte,
als öb si drvoo no öbbis hätte.
Natürlig isch, y waiss,
d Wält bald z glai für so vyyl Mais,
drum baut me verbisse an Rakete
zur Eroberig vo andere Planete,
denn s isch im Grund gno voll drnäbe,
ass die dört no in Friide läbe,
während mir uff unsrer Ärde
nie mit Mais mache uffhöre wärde.
Wenn die vo sälber d Lämpe nit sueche,
denn mien mir si halt go bsueche
und ene ordentlig dr Ranze versohle,
ass si sich nit so schnäll erhole.
Die maine sunscht no, das wär verwäge,
ihri Kultur syg dr unsere überläge.
Dä Irrtum mien mir korrigiere
und si gwaltsam zivilisiere,
ass au die Usserirdische verstöhn,
worum mir uns ständig d Biire yyschlöön.
Doch bevor mirs im Wältall so richtig löön krache,
mien mir zerscht no Fasnacht mache,
und wär sy Gebiss komplett will bhalte,
dä sött sich an folgendi Regle halte:
Wenn d VKB verby marschiert,
wird gfelligscht kreftig applaudiert;
wär unser Sujet kritisiert,
wird unverzüglig abserviert;
wär glaubt, s syg nit ärnscht gmaint, dä het sich tosche,
und wär nit lacht, dä wird verdrosche;
vom Komitee isch kategorisch
e hochi Subvention obligatorisch,
und trifft dä Stutz nit pünktlig yy,
denn wärde mir hässig und schlöön dry.
Denn punkto Fasnacht, merket euch das,
verstöhn mir überhaupt kai Spass,
und wärs nit glaubt, däm droht, ohni Schaiss,
für die näggschte zwanzigtuusig Johr Mais.