S Trudi Gärschter, unser Schätzli, hett jetzt au en aige Plätzli

Es hett emoll vor langer Zyt im diefschte Wald, ganz unde 
im hinderschte Taal, e Määrli-Stammdischrundi zämmegfunde
Dr Chef-Zwärg vo de siibe Zwärge hett verzwyflet saage welle
Dass fascht niemerts meh wurd die schööne Määrli verzelle
Syt däm s Trudi Gärschter vor elf Johr hett miesse go
Isch es schlimm - dä Zuestand syg jetzt laider e soo
Dääre truurige Gschicht stimme alli zue - das syg nit guet
Und jeede foht afoo verzelle, was ihn beschäftige duet

S Rotkäppli und dr böösi Wolf
Spiile syt Johre schynts nur no Golf
Und dr Jäger mit sym Gwehr 
Hett nüt me z schiesse – d Gedangge lehr
Im dunggle Wald laufe Hänsel und Gretel
Und verdaile em Stamm syni alte Fasnachtszeedel
S Schneewittli mit ihre siibe Zwärge
Sinn in d Ferie gange über alli Bärge 
Au dr Knüppel uss em Sagg
Verjagt scho lang me kai Lumpepagg

Ihre Dienscht yygstellt hänn die tapfere Ritter
Wäge vermehrt uffkommende schlimme Gwitter
E so duet au kaine meh drum wette
Wär d Prinzässin uss em Turm wurd rette
Völlig enttüscht sait au dr Froschekeenig
«Mi küsst me aifach vyl vyl zweenig»

Es finde sogar d Gebrieder Grimm
Dä Zuestand syg bedängglig schlimm
S Gschrey isch gross bi Kinder, Eltere und Verwandte
Si alli vermisse ganz fescht s Trudi als Määrlidante

E so hett d Stephanie vom Regierigsroot
Das vernoo vo dr groosse Määrli Not
Und hett beschlosse und allne gsait
Dass ab sofort e Spiilplatz em Trudi sy Namme drait
Und drum hett jetzt s Trudi Gärschter Schätzli
Mit ihrer Alaag au ändlig en aiges Plätzli

Am Määrli-Stammdisch fyyrt me das wie gstöört
Und wenn sy nit scho gstorbe sinn, denn sitze sy no dört