150 Joor Zolli

Hundertfuffzig Joor alt wird dr Zolli,
drum git’s im Summer e ganz e tolli
Geburtsdaagsparty im Birsigtal
für alli Dier und s Personal.
Me danzt und singt und lacht 
und het dierisch Spass bis tief in d Nacht.
D Papagaije und d Affe mache zämmen e Bänd
und spiile Jazz und Dixieländ. 
D Elefante sinn in beschter Luune
und bloose mit em Rüssel Posuune.
Uf d Kesselpauke und d Bongo
haut dr Gorilla us em Kongo. 
Dirigiert wird das Orchester
vom Orang-Utan syner Schwester.
D Pinguin seet me mit de Schimpanse
im Gänselimarsch Poloneese danze.
Im Taggt drzue dien im Dunggle
d Leue mit de Zebras schunggle,
wobyy sy ganz vergässe,
ass sii die sunscht amme frässe. 
S herrscht au im Vivarium
e Bombestimmig im Aquarium:
Die Fete im Korallemeer
gfallt de Fischli und de Qualle sehr.
Gfeschtet wird, ass d Fätze fliege
und sich alli Balke biege. 
Dr Zolli isch, me ka’s nit übersee,
nur zäh Joor älter als d VKB. 
Für Basel sind baidi unersetzlig,
denn ohni Zolli wär’s entsetzlig,
und e Fasnacht ohni VauKaBee,
das will jetzt wirklig niemerts see.
Drum wünsche mir Basel e tolli
Zuekunft mit uns und em Zolli.