Mit 75 jung und gnaggig und uff dr Route zimlig zaggig

Mit däm Motto sinn mir syt 75 Johr uff dr Gass
Will d Fasnacht macht uns ganz vyl Spass
«die Alte, vorwärts Marsch» rieft unsere Major trogge
Denn mache mir uns flingg uff d Sogge

Mir VKB Ueli hänn mittlerwyle scho e Bart
Aber in Wirgligkait, sinn mir no jung und zart
Scho 75 Johr dien mir uns uff de Stroosse tummle
Und flyssig unseri Märschli pfyffe und drummle
Unseri Route maischtere mir mit vollem Schwung
Kai Wunder, mir sinn trotz 75 halt no jung
Au unsere Major mit 75 Johr uff em Buggel
Isch immer no e glaine Zwuggel

Sait e VKB Ueli zum andere: «He Alte … 
Hesch Dy bis jetzt no rächt guet ghalte.
Dyni Bewegige sinn gar nit so drääg
Du bisch allem Aaschyn aa no rächt guet zwääg.»

«He jo», sait druff aabe dä glaini Maa 
«ych ha doch grad my Ovo hütt scho gha.
Ych halt my syt Wuche fit mit Marathon-Drummle
Gang jeede Daag durch d Lange Erle go bummle»

Und e so dien plötzlig alli brichte
Vo ihre Fasnachtsvorberaitigs-Gschichte

«Ych ha e früschi Batterie vo Duracäll
Dorum drummle ych e so schnäll»

«Und ych loss mi vom Pfyfferschlyffer schlyffe
Drum kan ych au vyl länger e so guet pfyffe.»

Das tönt jo toll und mir ziehn vor Euch dr Huet
Aber e Pause – wär jetzt au emoll guet

D Geburtsdaagstorte wartet – und das isch kai Scherzli
Wär hätt das dänggt - tatsächlig mit 75 Kerzli!

Vyyl Kuurligi Binggis sinn immer no jung und gnaggig
Und göhn scho bald wider uff d Route – so zimlig zaggig.