Schatte für Basel

Die letschti Yyszyt isch verbyy,
die neggschti kunnt schyns nit so glyy.
Das heisst, mir sinn jetzt zwüschedrinn,
drum isch's so warm, das macht glaub Sinn.
Me seet's scho an verschidne Sache,
dass d'Wärmi duet Beschwärde mache.
Yysbäre suecht me do vergaabe,
will si jetzt im Norde lääbe.
Läbte die Bäre do, die Wysse,
si würde s Fäll vom Körper rysse.
Und d'Pinguin sinn in Süde zooge,
d'Hitz duet si dorte nümme blooge.
Drfür git's Wölf und bruuni Bäre,
wo s Fell am beschte würde schääre.
Denn au iine, wie me weiss,
macht das digge Fell vyyl z'heiss.
Dass d'Wölf vor Hitz nit afööhn lalle,
ka me si au aabeknalle.
Und d'Vögel hänn, das isch allerhand,
uff ihre Flügel Sunnebrand.
S wird als wie heisser jedes Joor,
d'Gsundheit isch in Gfoor, s'isch woor.
S duet mit dr Wärmi wirgglig gniege,
wenn d'Schiine sich sogar verbiege.
Am Banggeplatz sinn, s'isch nit glooge,
Drämmli us de Schiine gflooge.
D'Velo blyybe im Verkehr
stegge wäge em waiche Teer.
D'Stei sinn heiss, s'isch nit zum Lache,
me könnt druff Spiegeleier mache.
Wenn d'Küeh nur suuri Milch abgänn
und alli in e Brunne wänn,
wenn kuum me schnuufe kasch vor Hitz,
hilft au e yyskalt Bier kei bitz.
Was denn no hilft, s'erschtuunt jo kuum,
isch e klimatisierte Ruum.
Wird bi de Mensche s Hirni z'heiss,
kunnt Schwachsinn use, wie me weiss.
Au s Esthi Käller hetts glaub droffe,
si isch ganz schön ins Offside gloffe.
Hett gmeint, si könn sich profiliere,
drby duet si sich nur blamiere.
D'Idee isch, alle Schatte z'spände,
drmit die grossi Hitz abwände.
Will s'ganze Volgg vor Wärmi schütze,
merkt nit, dass es nüt duet nütze.
Mit Sunnesäägel in dr Freie
will si s'Volgg vor Hitz befreie.
Statt Diecher über d'Stroosse z'hängge
könnt me em Volgg doch Kappe schängge.
Dr Groossroot het au z'heiss bikoo,
andersch isch das nit z'verstoo.
Si spräche nüünehalb Millioone,
damit mir kieler solle woone.
Me duet's für Sunneschirm verwände,
wo solle bitzli Schatte spände.
D'Bäum uff dr Pfalz, die duet me fälle,
zum Sunneschirm dört ane z'stelle.
Die wunderschöni und tolli Beschattig
benutze d'Hündli für d'Begattig.
Für ei Sunneschirm elei
zahlt me schyns zäädausig Stei.
Hundertfünfenünzig sinns total,
das isch doch gschpunne, nit normal.
Denne kauft me Gstrüpp und Pflanze,
voll mit Spinne, Käfer, Wanze.
Dort dörfe Bsuecher drunter sitze,
damit si nümme sotte schwitze.
Schatte solle d'Pflanze spände,
doch sinn si für das nit z'verwände.
Bim Baudep hänn si nit begriffe,
dass numme d'Hünd gärn ane schiffe.
Zäädausig koschtet ei so Baum,
s'isch wirgglig woor und nit e Draum.
E bsundre Gspass, wo au nüt bringt,
isch s'Wasser, wo us Düse dringt.
Dä Wassernäbel, wo sott kühle,
isch in Wirklichkeit zum Briele.
Denn lauft me drüber, jetzt muesch lose,
sprützt's vo unde grad in d'Hoose.
Drzue isch d'Brülle pfläddernass,
me kühlt sich lieber, s'blybt drbyy,
mit me Gump in warme Rhyy.
Denn git's no s'Tüpfli uff em i,
me meint, das ka doch gar nit sy:
Um dä Schattewahnsinn z'blaane,
müen no meh Staatsbeamti ane.
Mir frooge is, wie ka me numme
mit so vyyl Gäld, e Riesesumme,
für Schatte so ne Uffwand mache?
Die ganzi Schwyz duet drüber lache.
Drzue wird scho e Grücht verbreitet,
s Baudep syg guet vorbereitet:
bi Kälteeinbruch, wenn's duet schneie,
dr Boode z'heize in dr Freie.
Denn will me au, es het sy Nutze,
die vyyl warmi Luft benutze,
wo si im Baudep produziere,
dur d Stroosse in dr Altstadt fiere.
S isch Zyt, dä Unsinn rasch z'beände,
Stürgälder uff die Art z verschwände.
Bevor d Regierig, voll drnääbe,
zum Schutz vo unsrem Ärdelääbe,
plant, zum alle Schatte gää,
im Summer d Sunne yyne z nää.