I’m checking out

Im Buckingham Palace herrscht e gschpängschtyschi Rueh,
d Vorhäng sinn zooge und d Fänschter sinn zue.
D Zoofe und d Butler stöhn in düschtere
Ecke und dien uffgreggt flüschtere,
denn d Queen Elizabeth die Zwaiti het
sich hüt noonig erhoobe uss em Bett. 
Vorusse im Park warte d Paparazzi
vergääblig uf Fotteli vom Morgespazzi
vo dr Königin und ihre Corgi-Hündli.
Me mungglet, s haig villicht s letschte Stündli
vo Ihrer Majeschteet scho gschlaage
und d Nation haig e groosse Verluscht z beklaage.
Vor em Krankezimmer hänn sich d Royals versammlet,
in elegante Klaider, aber moralisch vergammlet.
D Camilla duet, ohni sich z geniere,
giftig dr Prinz Charles kritisiere:
„Wie willsch du König wärde vo unsrem Land,
wenn dyny Ohre gröösser sinn als dy Verstand?“.
Dr William und dr Harry mit ihre Grytte
föhn scho aa über d Erbschaft strytte,
bald wärde sy in Interviews und Memuaare
sich geegesyttig böös an Karre fahre.
D Queen maag die Lämpe nümme hööre,
wo ihre Seelefriide stööre,
sy luegt no e letschts Mool umme im Zimmer
und denn schlooft sy yy für immer. 
Uf em Nachttisch liggt ihr Teschtamänt
mit Tinte gschriibe uf Pergamänt,
ai Satz nur stoot dört ganz ellai: 
„I’m checking out, tschüss and goodbye!”.