Statt im Bach go schwimme geen mir in Prattele go schwinge

Dr Babbe maint bim Mittagässe,
schwimme im Rhy kasch das Johr vergässe.
Es wurd uns sicher vyyl meh bringe,
mir göhn uff Prattele go schwinge,
ans Eidgenössisch Schwing- und Älplerfescht
mit em Bundesroot und ganz vyyle Gescht
Dr Fabian und d Lia findes e tolli Idee
Das hänn sy scho lang emoll welle gseh.
So gohts mit Freud und frohem Gmiet
mit em Zug uff Prattele ins Baselbiet.

Uff em Feschtgländ gitts ganz vyyl Sache,
Wo de beide Kinder Freud dien mache.
Lueg, was es do alles z gwinne gitt,
do kunnsch vor Stuune nümme mit.
Gschnitzti Kommode, Tisch und Stiehl,
Kuehglogge und vyyl meh in däm Gwiehl.
Für die beschte Schwinger gits drzue
e Muni, e Ross, oder sogar e Kueh.
Jetzt aber ab in die grooss Arena sitze
und luege wie sy schwinge und schwitze
und sich die Schwinger ohni z zugge
geegesyttig ins Säägmähl drugge.

Dr Fabi maint scho bald: «he jo, genau
was die do mache, könne mir doch au.
Kumm Babbe, gib dr e Schupf,
mir zwai mache jetzt e Hooselupf.»
Jetzt muesch loose, ganz wiene Groosse
paggt är dr Babbe an de Schwingerhoose.
Duet sich denn e bitz no füüre bugge
und gseht zwüsche de Bai vom Babbe e Lugge.
Däm jagts druff aabe ains in Rugge
Und so ka dr Fabi dr Babbe ins Säägmähl drugge

D Lia lacht - für dr Fabi isch es d Kröönig
Sy fühle sich beidi als Schwingerköönig
Är wüscht em Babbe s Säägmähl vom Rugge
denn hörsch dr Babbe no aimoll kurz zugge:
«Oh je, ych spür my Krüütz fascht nimme
Wäre mr doch lieber in Bach go schwimme.»