Mer hoole alles noch

Zwai Joor lang hänn mer nit vyl ka zem lache,
hänn in dr Freyzyt legal fascht nüt könne mache,
sinn im Winter by offne Fänschter im ene kalte
Schuelzimmer ghoggt und hänn d Schnurre ghalte.

Doch jetzt isch gnueg, mer wänn nümm miesse
uf alles verzichte, sondern s Lääbe gniesse, 
mer wänn raise, an Mätsch go, in d Disco go danze, 
mer hoole alles nooch, im grosse Ganze.

Mer hoole alles nooch, lieber hüt als nie, 
göhn ohni Zertifikat in d Stadt ain go zie,
und halte kai Abstand meh in dr Baiz,
denn e Druggedde het uf aimool e bsundere Raiz.

Mer hoole alles nooch, s könnt’s sogar sy
villicht, eventuell, unter Umständ scho gly,
und mache womöglig, s’wär e Gnuss,
Fasnacht ohni 3G oder 2GPlus.

Mer hoole alles nooch, denn nur uf dr Gass
macht’s Drummle und Pfyffe erscht richtig Spass,
wenn me statt Masgge wiider darf Larve trage
und s Räppli räägnet vom Waggiswaage.

Mer hoole alles nooch, und zwoor,
wenn nit jetzt, denn halt im näggschde Joor,
sobald me’s uns wiider erlaubt,
irgendwenn, irgendwie und falls überhaupt.