Statt Kaoote und Vandale duet jetzt s Bruuchtumm wiider straale

Wär vyyl schafft und grampfe duet, 
het ab und zue au Freyzyt z guet. 
Me wanderet und musiziert, 
spörtlet und isch angaschiert
in Clique, Clubs und in Verein; 
vermisse möcht die Freyzyt kein. 
Doch mängge het drvo scho z vyyl, 
das fiert denn glyy zue Langewyyl. 
Do drus entstöön die radikaale
Neo-Kaoote und Vandaale.
Wo denn bi Fuessball Mätsch fruschtiert 
als schwarze Blogg zem Spiil marschiert. 
Si zünde Pyros und Pedarde,
dien nochem Spiil uff d Gegner warte, 
zum die z vermöble und z verhaue 
um so dr aige Fruscht z verdaue.
Mir frooge uns was isch dr Grund,
dass d Jugend oft so uuse kunnt? 
Intelligänz isch nümme wichtig,
sich zämme spüüre die neu Richtig.
Me reedet nümme mitenand 
het nur no s Handy in dr Hand.
Drby wird alles hinterfroggt
und statt gleert uff d Strosse ghoggt. 
Statt dängge und e Lösig sueche 
goot me an Demos und duet flueche. 
S git nur ai Thema „Klima Gryyse“, 
mir Alte sin drby die Myyse
wo Zeiche vo dr Zyt nit hööre
und schyynts die ganzi Wält zerstööre. 
Us all däm gits, s isch lyycht z veroote 
Vandaale und erscht rächt Kaoote.
Mir Ältre finde das nümm toll,
kurz gsaiit, mir hänn jetzt d Nase voll. 
Doch s git no Ort wo s friidlig isch, 
wo d unter vyyle Zfriidne bisch.
Bruuchtum, Tradizzion, Folklore, 
wärde wiider neu geboore.
E Hampfle Byschbiil soll euch zeige
wie gross dr ganzi Bruuchtum Reige.

S Eidgenössisch Schwingfescht bsueche 
Lüt wo s urchig Bruuchtum sueche.
Schwinger styyge do in d Hoose, 
brobiere denn mit zieh und stosse,
mit Hooge, Brienzer, Fuessstich, 
Gamme dr Gegner uff e Rugge z ramme.
Wenn ain dr ander zue sich paggt, 
könsch maine syg e Liebesaggt.
Mit Wyberhooge, Kurz und Schlungge, 
duet ain e Senn ins Säägmääl dungge. 
Denn butzt är ihm dr Drägg vom Rugge, 
dass är nit mee vo däm muess schlugge. 
So kämpfe die vo frieh bis spoot,
bis au im Letschte d Luft us goot.
Und däm wo gwünnt, wär hät das dänggt, 
wird denn am Schluss e Muuni gschänggt. 
Zueschauer nämme voller Luscht
E Brotwurscht und e Bier zer Bruscht
S git kaini Demos, kai Kaoot
Wie schöön und friidlig das doch goot!

Folklore isch nit numme s Schwinge, 
grad so luschtig isch au s Singe.
Wenn Senne joodle mitenand, 
verliere d Fraue dr Verstand
und gmischti Chöör mit schööne Fraue, 
dien s Volgg  grad us de Sogge haue. 
Zem au die höggschte Döön yyzfange, 
hänn d Männer schyyns im Sagg e Zange 
und mit de hoche Döön ganz oobe,
singe si sogar Synkope.
An Joodlerfescht wird nit nur gsunge, 
es wärde au no Faane gschwunge. 
Sy fliege hoch grad wie im Draum 
und lande au e mol im Baum.
Vor Riehrig föön d Lüt afo hüüle 
längt ain drnääbe gits e Büüle.
So fyyrt me Bruuchtum Hand in Hand 
als Patriote mitenand.
S git kaini Demos, kai Kaoot
Wie schöön und friidlig das doch goot!

No ganz vyyl Volggsbrüch finde statt, 
s git sicher ain in jeder Stadt.
In Sursee wird bi Nacht und Näbel 
e Gans enthauptet mit em Säbel.
In Lieschtel renne dunggli  Wääse 
dur s Stedtli mit vyyl Füür im Bääse. 
Dr Vogel Gryff isch do für s Gmiet, 
me lüpft dr ganz Daag schwarzi Hiet.
In Züri duet me, s isch zem lache 
e Füürli für e Schneemaa mache 
und in Bärn es fiert ze Drääne 
isch dr Ziibelemärt z erwääne.
S git Winzer- und Oktoberfeschter, 
Silveschterchlause am Silveschter. 
Bi Volggsläuf duet me Runde drülle, 
an Banndääg drfür d Lampe fülle. 
Au ghornusst wird an vyyle Ort
Das isch e ächte Schwyzersport. 
An d Älplerfeschter, s isch e Hit,
rennt s ganze Volgg und macht dört mit. 
Me luegt wie Gwäggi mit de Händ 
gstosse wärde wyt ins Gländ.
Au Alphornblööser hänn s Vergniege 
und bloose bis sich d Balgge biege. 
Hinde bloost ain dry wie gschtöört, 
damit me vorne öbbis höört.
Bösi Tschäggätä, jetzt schnall is, 
gits im Lötschetal im Wallis.
Geissle-Glöpfer gits z Luzärn, 
die vyyle Fän die hän das gärn.
Z Basel könntsch das grad vergässe, 
by uns do wärde Glöpfer gässe.
S git kaini Demos, kai Kaoot
Wie schöön und friidlig das doch goot!

Dr schönschti Volggsbruch das ich woor 
Isch unsri Fasnacht jedes Joor
Drum gniesse mir drey Dääg am Stügg 
und das kaootefrey, zem Glügg.