BASS UFF WAS DU SAISCH! (abgesagt)

Wenn ain, wo s Volgg verbinde set,
als Kaiser Rom aazinde wet
und s Land isch naimeduure gspalte,
isch s besser gsi, hesch d Schnuure ghalte,
sunscht het me di am Strang uffghänggt
oder e Lääbe lang versänggt.
Im raabeschwarze Mittelalter
hän klerikali Dittelhalter
mit harter Hand regiert und glaitet
und Angscht denn konzentriert verbraitet.
Glaub oder stirb! Hän si entschiide
du stirbsch, het niemerts di beniide,
denn hesch fir Sinde zahle miesse
und mit brutale Quaale biesse,
was anderi verbroche hän.
Bevor s di zem verloche gän,
hän scharfi Hind di grass verbisse,
denn hän s di in s haiss Wasser gschmisse.
Druff uff e Streggbettbangg verlegt
und s Gnochegstell deert schlangg verstreggt,
im haissen Eel denn baade loo,
e groosse Dail het Schaade gnoh,
mit Lanze dir in Ranze gstoche,
druff alli Gnoche ganz verbroche,
uff s Rad gspannt hän s di, rings rund umme,
däwääg wird au di Dings e Grumme.
Au teert und gfääderet bisch worde.
S näggscht non em Foltere isch morde,
denn hesch nit gsait, dass schuldig bisch,
findsch kaine wo geduldig isch.
Me het im Loch di glatt vergässe.
Am Schluss hän di deert d Ratte gfrässe.
Au aafangs Neizyt goht s so wytter.
Fir Gauner, Ketzer stoht s do schytter.
Im Keefig fiehrt me si duur d Stadt,
das finde die denn nit nur glatt.
Me het si so ganz lang blamiert,
an Branger gstellt und drangsaliert.
Druff hesch si am e Strang persee
am Galgehiigel hange gseh.
Isch aini ledig schwanger gstrandet,
isch die au brompt am Branger glandet.
Z vyyl Häxe gäb s, dr glatti Wahn,
mahnt denn dr Scheff im Vatikan.
Me heert ihn im Verdraue saage,
me soll die beese Fraue jaage.
Me het die z Basel glyy verdränggt
und vo dr Brugg im Rhy versänggt.
S hän andri, statt versuffe loo,
d Häx uff e Schytterhuffe doo.
Wär d Zircher Zumft-Kolleege kennt,
waiss, die hän d Häx als Beeg verbrennt.

S git hit no, und nit minder, Länder
mit Folter und mit Kinderschänder.
S Volgg zämmegstuucht mit gar kaim Rächt
und ohni Freihait, s wird aim schlächt.
Do goht s uns guet, mir kenne sage,
was mir wänn und denn verglaage,
wär mir wänn und d Naase rimpfe,
denn au bis zer Eggstaase schimpfe,
iiber d Regierig, jeede Daag,
wel schyynt s kai Mensch die Bleede maag.
Doch wirgglig sin mir nit ganz frei,
denn saisch was dänggsch, griegsch ain an s Gwei.
Schrybsch du e Lääserbrief in d Zytig,
kunnt vo vyyl Wääse schiefi Grytig.
E Bääse schrybt: Ain wo so dänggt,
mecht ych am liebschte schloo statt gschänggt.
Drby hesch numme wisse welle,
eb bschisse wird an gwisse Stelle
im e Museum, wo verkindet,
dass Zyyg ganz aifach so verschwindet.
„Shitstorm“ haisst hit die Fluet voll Wuet
und duet schyynt s nit im Bluetdrugg guet.
Sehr gfrogt sin d „social media“,  
denn jeede und au jeedi ka
sich so im Internet vernetze
und deert versteggt um d Wett go hetze.
Losst im e Blog e Bogg ain uuse
und schrybt: S will mit däm Rogg kain schmuuse.
Es gruust aim, zem am flache Buuse
vo däm uralte Drache pfuuse.
Denn aber goht e Gwitter loos.
D Empeerig isch uff Twitter grooss.
S schrybt aini: Dä gheert glyy kaschtriert,
wenn dä die Frau so schigganiert.
En andri blogt: Dä Frauehass
vo dääre dumme Sau isch grass.
E dritti twitteret: S isch Zyt
zem kämpfe, denn als Frau bisch nyt.                                                                                          
E Star schwärmt, dass är s Fliege gniesst,
wenn är s wurd hasse, liege miesst.
Fir ihn syg das System e Hit,
är haig au kai Broblem drmit
und frogt: Worum, yych grieg s nit zämme,
soll yych mi wäg em Fliege schäme?
Au wenn die Greta gwiss verbisse
d Lyt warnt, wär wurd die Miss vermisse?
Y hoff, die Klima-Hysteryy
isch denn emool ganz glyy verbyy.
Druff haglet s beesi Kommentar:
E groosse Star und son e Naar,
haisst s im e Blog, du bisch e Dumme,
das mit em Fliegen isch glyy umme.
S wär scheen, s Schiggsal wurd s duure griege,
dass du schnäll wurdsch uff d Schnuure fliege.
E Draum wär, ohni z murre schalte
und aifach emool d Schnuure halte.
Im Facebook schrybt ain rund um s Fliege,
s gäb fir e Bund kai Grund zem liege.
Me het z Bärn kai Bedängge gha,
eb me do d Schaadstoff sängge ka.
Klimaneitral isch s sportlig Zyyl,
zem mache git s drum ordlig vyyl.
Dr Bundesroot verraist so gärn,
s erscht isch drum, wie s denn haisst in Bärn,
me schänggt, wie me verroote het,
im Bundesroot, wie s stoht, e Jet.
Me ka dä Bschluss als Richtnorm näh,
drum het s aimool kai „Shitstorm“ gäh.
Sunscht tobt dä Sturm do konzentriert,
z vyyl Schyssdrägg wird so produziert.
Drfir isch d Fasnacht do kai „Shit“,
denn son e „Shit“ macht kai Bay mit.
Au s Schyssdräggziigli isch kai „Shit“,
s isch, wenn du Mitgliid bisch, e Hit,
doch wär s e „Shit“, däätsch bleed dry gnaisse,
wel s „Little Shit Parade“ wurd haisse.