Dr Summer isch haiss, dr Rhy isch voll (abgesagt)

In unserer Schuel lehre mir vyyl über s Klima
Unsere Lehrer findet das total prima
Au lehre mir dr Wärt vom Wasser schetze
Und dass mir drby au d Natur nit verletze
S grööschte Gwässer bi uns wie ka s anderscht sy
Isch bi uns nadürlig unsere schööne Rhy
Dört kasch ganz gmietlig uff d Fähri sitze
Und kunnsch drby denn doch ins Schwitze
Machsch drno e Sprung ins Nass
Do hänn vor allem mir Kinder vyl Spass

Isch s im Summer haiss mueschs begryffe
Gohsch lieber in Rhy als in Käller go pfyffe
Au wenn dr Pfyfferlehrer uns möcht schlyffe
Muess au är das halt begryffe
De merggsch es vor allem au bim Sitze
Dass me vermehrt am Gsäss duet schwitze 
Dr Schwaiss lauft aabe durch alli Ritze
Do hilfts au nit, d Ärmel hintere z litze

S haisse Wätter duet alli an Rhy aane logge
Sogar die Griene mit handgschtriggde Sogge
Wo nit nur am Rhybord uff em Diechli hogge
Und e Sprung in Rhy dien wooge – mitsamt de Sogge

Au dr Stroofzeddel-Sheriff vo dr Patroullie Vier
Verlosst für e knapp halb Stündli sy Revier
Entledigt sich rasch synere Uniform
Und freut sich uff e Rhyschwumm ganz enorm
Kurz druff aabe sinns denn plötzlig drey
S kömme no zwai drzue vo dr Kriminalbolizey
E bitz spööter denn bi dr Wettstaibrugg
Göhn die drey wider uff ihre Boschte zrugg

D Lehrere vom Schuelhuus Brunnmatt
Findet die Idee mit em Rhy no glatt
Isch s im Summer nämmlig haiss
Mache d Schieler sowyso nur Schaiss
Drum maint sy: «Kinder mr löhn d Schuel jetzt sy, 
und rysse zämme e Schwumm im Rhy»
Dr Luigi macht schlapp bim Stroossebau
Schwitzt vor sich aane, wie alli andere au
«Goffedelli, so kasche nite schaffa,
muesche gar nite so schtupidelli do aane gaffa»
Är schnappt sich kurz dr Wiggelfisch
Und zäpft an Rhy was hesch was gisch

Und au die diggi Dante Emma
Isch jetzt grad im ene Dilemma
Sy möcht am liebschte au in Rhy
Nur kunnt sy nümm in Schwümmring dry
Ych würd do saage, nach mym ermässe
Hett die doch aifach vyl z vyl Torte gässe

Au d Mamme sait zue uns am Mittagsdisch
«Kumm, nämmet alli dr Wiggelfisch
Über e Mittag göhn mr in Rhy als neuschte Gäg
Und zum z Midaag gitts e Börger vom Mäc»

Voller Freud kunnt au dr Babbe
Mit aabetrampte Badeschlabbe
Und sym glaine Wohlstandsranze
Gmietlig an Rhy aabe z danze
Vo wytem rieft är wiene Dier:
«An dr Buvette gitts denn e grosses Bier»
und spööter denn im Klingeli Revier,
länggts grad nomoll für zwai, drey, vier
Är maint das syg denn bsunders toll
Am Änd isch nit nur dr Rhy, sondern au dr Babbe voll

Uffgreggt rieft dr Babbe wiene Geier
«He lueget, do schwümmt d Familie Meier»
Au die hänn mit Sagg und Pagg
Ihri Däsche gfüllt, in dr ainte no e Dudelsagg
«He jo, für die alte Gyzknäbberkrääge
Isch s Schwümme im Rhy e groosse Sääge»
Das duet e so vor allem guet klappe
Für Lüt mit eme Budget, emene knappe
Will in Rhy ka praggtisch jeede gumpe
Do bruchsch kai Stutz und muesch nüt pumpe
Bi dr Klingeli Buvette hett d Familie Meier mieh
Sy mien dr Herr Meier erschöpft uss em Wasser zieh
D Frau Meier isch usser sich vor Stuune
Und dr Herr Meier macht ain uff schlächti Luune
«Hänn sy ghört? Das isch doch dr Hammer
Was in däm Rhy alles ummefahrt – e Jammer»

Dr Babbe schüttlet dr Kopf mit sym Gnigg
E so Blödsinn stoht sicher nur im Bligg
Dr Meier luegt en aa mit Auge ganz groosse
«Jä nai, jetzt mien sy gnauer aaneloose»

Unter anderem isch es jo scho länger bekannt
Im Rhy findsch au Velo, Schueh und allerhand
Bim Schwümme im Rhy gitts allerdings au Sache
Wo me sich ärnschthaft Gedangge sött mache
Me haig im Rhy schynts – nit emoll so wyt unde
Tonnewys Chemikalie aller Art dört gfunde
Wo durch Huushalt und au vo dr Industrie
So ainiges ändet in unserem schööne Rhy
Vo Löösigsmittel und Medikamänt
Creme für dr Körper und au für d Händ
Vo Kontraschtmittel, wo me für s Röntge verwändet
Kai Wunder, dass e so jeede Fisch verändet
Künschtligi Siessstoff und Roschtschutzmittel
Und zwüscheduure schwümmt en alte Kittel
Mit Herbizid und Fungizid 
Also mir goht das jetzt langsam z wyt
Die grossi Froog isch drum zum Gruuse
Wie griegsch dä Mischt au wider zum Wasser uuse
Will unseri Kläraalage das schynts nit kenne
Sy dien also nit nur in dr Regierig penne
S Fazit finde gar nit alli wirgligg toll
Unsere Rhy isch mit vyl schädlige Sache voll
Do hätt jetzt s Greta vo Schwede wider öbbis z saage
Aber glaub mr, Gretli, das ligt au uns uff em Maage

Dr Babbe sitzt no immer am Bier mit syne Schlabbe
Und maint mit eme Satz – emene knappe
«Jo super, jetzt goht mr e Liecht uff, ojee
Gohsch in Rhy, bruchsch kai Nachttischlämpli meh
Mit so vyl Chemie am Ranze, hösch
Lüchtisch die halbi Nacht uss dynere Wösch»
Är findet die Situation syg allerhand
D Lüt maine du haigsch e Sunnebrand
Drby hesch en Ussschlaag e roote
Kunnt das äggschd vo de Fisch, dääne doote?
Em Babbe wird s jetzt langsam z bunt
Wär waiss wie das no uuse kunnt
Dass är sich nit no meh muess schämme
Paggt är sy ganze Grümpel zämme
Dä Rhy syg ihm jetzt ainerlai
«Salli zämme, ych gang jetzt hai»

Und d Moral vo dääre Gschicht
Me liist jo täglig soonigi Bricht
Wo me z vyl Plastigg duet beklaage
Drby muess me do jetzt saage
Es brichtet kaine vo dääre Chemie
Wo ummeschwümmt in unserem Rhy
Mir Binggis finde s gar nit toll
Will dr Rhy isch ebbe nit nur im Summer voll