Back to the Future - d 80er Joor sin zrugg

Wär modärn will sy und voll im Trend,
het’s schampar schwäär, denn är rennt
schtändig Mode nooch, wo hüt zwoor in,
aber morn denn scho veraltet sinn.
Haltsch dy Outfit uf em neuschte Schtand
dangg Boutique und Poschtversand
und bisch klaidigsmässig ganz generell
immer z vorderscht drby und topaktuell,
denn waisch us Erfaarig, ass es nüt git uf Ärde,
wo nit irgendwenn ka modisch wärde.
Drum luegsch im Färnsee jedes Lifestyle-Programm
und duesch im Facebook und uf Instagram
die gailschte Influencer abonniere,
wo dii dääglig dien informiere,
was zur Zyt am maischte gfallt
und aagsait isch bi Jung und Alt.
So erfaarsch zu dym Erschtuune,
ass die jüngschti Modeluune,
dr letschti Schrey oder kurz
dr allerneuschti Furz
e Rais syg in d Vergangehait,
also Schnee vo geschtert, oder anderscht gsait,
kalte Kaffi, denn punkto Look,
syge d’Achtziger Joor jetzt wiider zrugg.
Dasch Grund gnueg, ass sich e mängge wundert,
wieso dr schlächtischt Gschmagg vom letscht Joorhundert
us dr Mottekischte isch ufferstande
und e Groosserfolg het könne lande.

Als Frau drait me wiider Schtulpe bim Jogge,
drzue e Paar neonfarbigi Sogge,
und hutängi Leggins, wo me je nach Volume
wie ne Schpargle ussseet oder wie ne Pfluume.
Me legt in dr Taille e Gürtel aa,
au wenn me so fascht nit schnuufe ka,
und schtopft sich Polschter, je nach Alter,
in d Schultere oder in Büschtehalter.
D Farbe wäält jeedi, wie sii grad will,
Hauptsach, sii sinn schreeg und schrill
und dien metallisch glänze
und fluroresziere an de Ränze.
Paillette, Ketteli, Niete und Schnalle
dien als Schmugg ganz bsunders gfalle,
und uf em Smartphone in dr Rieblihoose
duet me Lieder vo dr Madonna loose,
oder vo dr Neue Dütsche Wälle
d Nena mit dr lutte Gälle.

Als Maa kasch poppigi Hemli traage
mit extrawytem XL-Kraage,
oder en Overall, e bequäme, wenn s goot,
möögligscht hällblau oder rööselirot,
und hesch e Zange im Sagg, könnt’s sogar glinge,
no hööcher als dr Dieter Bohlen z singe.
D Krawatte isch so schmal, ass sii zur Not
au als Ersatz für e Schuebändel goot.
Duesch dyni Jeans bim Wäsche blaiche
und hesch kloobigi Schtiifel an de Schaiche
oder glänzigi Schieli wie gschläggt,
denn triffsch dr Schtiil vo de Achtzger perfäggt.

Nit nur in dr Mode, au in andere Schparte
duet dä Achtziger Boom entarte:
S git Computerschpiil, s isch fascht gemain,
die sinn programmiert im Retrodesign,
die hänn Pixel so grooss, ass sogar e Blinde
dr Wääg zum Level 10 ka finde.
Doch unbeschtritte dr grööschti Hit,
syt’s uf dr Ärde Schpiilzüüg git,
isch dr Rubik-Würfel; joo, dasch woor,
au dä schtammt us de Achtziger Joor.
Geometrisch gseh, s kaa’s kain beschtrytte,
het das Ding säggs Ussesyte,
wo jeedi jewyyls separat
sich unterdailt in nüün Quadrat;
die kaa me, das isch bsunders wichtig,
beliebig draije in jeedi Richtig;
drzue het zur bessere Orientierig
jeedi Syte en aigeni Kolorierig,
und zwoor orange, wyss und au
rot, grien, gääl und blau.
Doch isch dr Hoogge dra und s Schlimme,
wenn d Syte farblig nit zämme schtimme;
denn muess me versueche dur Draije und Wände
das Farbeduurenand z beände:
me drait zwaimool nach rächts und dreymool nach linggs,
und aimool nach oobe und hofft, e so gling’s,
d Farbe suuber ussenander z halte
und en erschti Syte aifarbig z gschtalte.
Kuum isch das glunge, entdeggt me mit Schregge
oobe an dr Kante e Fähler am Egge
und merkt, ass es so nit wyter goot,
denn vo drey Quadrat sinn zwai blau und ains rot;
me foot nomool aa, e Riisegschyss,
doch denn sinn zwai grien und ains isch wyss,
und uf dr andere Flechi, wo orange sott sy,
schlyycht sich e gääls Quadräätli yy.
So drait me während lange Schtunde
nach linggs, nach rächts, nach oobe, nach unde,
me drait und drait und drait und drait
und drait wyter bis in d Ewigkait.
Mir könne nur hoffe, die Euphoryy
für d Achtziger Joor verschwindet glyy,
denn sunscht verliere mir, s wär allerhand,
nit nur dr Gschmagg, sondern au dr Verschtand.

Doch git’s ains, wo mir alli leere sotte
us däm Revival vo de alte Klamotte:
Willsch in dr Zukuenft modisch syy, denn pagg
dyny alte Sache nit in Bebbisagg:
Muesch nur Geduld ha, denn periodisch
wird jede Grümpel wiider modisch.