D Pirate vo Batavia sueche e neus Dehaim

Normalerwys duet dr Luca am Samschdig lenger pfuuse
Doch hütt muess die ganz Familie scho frieh uuse.
Dä Samschdig wird sicher ganz schön stargg,
Sy raise uff Ruscht – in Europa-Park.
Au sy Schweschter freut sich scho uff d Bahne,
Drum göhn sy aigentlig au dört aane.
Vo Silverstar, Bluefire, Wodan und Batavia,
Kömme sicher alli Bahne dra.

Uff dr Autobahn fahrt dr Babbe wie gstöhrt,
Will d Kinder ständig frooge: «wenn sinn mir dört?»
Uff em letschte Kilometer dr erwarteti Stau,
S wänn e Huffe ans glyche Ort halt au.
Denn ändlig akoh, es isch famoos:
«Kumm Celine, jetzt gohts ändlig loos!»
Dr Luca muess e Wääg dur d Lyt duure bahne,
Sunscht kämte die zwai gar niene aane.
Uff schnällschtem Wääg im Island hinde,
Dien dr Luca und d Celine dr Wodan finde.
Bi dääre Bahn hetts umsveregge,
In jedere Kurve e runde Egge.
Duuregschüttlet wie ne Dattlesagg,
Kunnt s Gribble und d Uffreegig im Doppelpagg.
Uff dr Bluefire isch d Celine nach e baar Sekunde,
Im ene Looping mit em Kopf ganz unde,
Bevors imene gschruubte Salto wytergoht,
Und d Wält definitiv uff em Kopf grad stoht.
Au dr Babbe isch im Gsicht lycht root,
Und merggt erlychteret, är syg jo gar nit doot.
D Mamme maint mit haisse Ohre:
«Oje, ha glaub grad my Make-Up verloore.»
Mit lycht drümmligem Befinde,
Losst dr Luca denn verkinde:
«Hey looset, jetzt isch es Zyt,
Bis zue de Pirate isch es vo do nit wyt.»
D Kinder freue sich – «Fidiralalaa,
Jetzt göhn mr ändlig nach Batavia.»
«Kumm Celine mr mien pressiere,
Mr wänn jo nit vyl Zyt verliere.»
Je nööcher sy aber nach Holland wandere,
Kömme ganz vyl Lyt entgeege, aine nach em andere.
Fascht am Zyl kunnt e ganzi Horde z renne:
«Hilfe – Füürio – in Batavia duets brenne!»

Füürwehrmänner mache d Schlüüch barat,
D Bolizey sperrt ab, jetzt hämmer dr Salat.
D Heggtigg isch grooss, me hört nur Gschrey,
s Entsetze brait und d Bai schwär wie Bley.
Dr Luca hett grad gwüsst nach sym Ermässe,
D Pirate vo Batavia kasch vergässe.
In däm Dail vom Vergniegigsgarte,
Sinn alli Mensche kurz vor em duurestarte.
D Hildegard schwäär und gross wiene Ross,
Flüchtet vis à vis ins Gaischterschloss.
Dört sait dr Erwin, wo das duet verwalte:
«Dasch prima, die könne mr als Attraggtion grad bhalte.»
Au d Waltraud uss Dütsche Lande.
Stoht z vorderscht an dr Sicherhaitsbande,
Wo, wie die Horde vo Tourischte-Affe,
Uss Wunderfitz muess aane gaffe.
«Schau mal Karl, wie das tut brenne,
S Schlimmschte was bassiere hett kenne.»
Unglaublig – wär hätt das dänggt?
Fünfhundert Sicherhaitskreft hänn nit glänggt.

Me hetts in allne Medie ghört,
D Pirate vo Batavia sinn zerstört!
D Folge sinn enorm und fatal,
En Uuseforderig für Mensch und Material,
S Uusmaass verheerend und kataschtrophal,
D Goschdym vo dr Lagerhalle verbrennt – brutal.

Dr Schregg sitzt dief und d Enttüschig isch grooss.
«Kumm mr sitze ins Kaffi, das in dr Nööchi vom Flooss,
und erhoole uns vo däm Schogg e bitz.»
Do hört dr Luca plötzlig e Stimm, ohni Witz.
Es losst em kai Rueh und voller Wunderfitz,
Im Gebüsch wyter hinde sitze zwai Pirate-Kids.
«Salli zämme, was machet ihr denn do?»
«Wägem Füür hänn mir miesse Batavia verloh.
Mir sinn nur zue zwait und ganz ellai,
Und vor allem sinn mr jetzt niene dehai.»
«Das isch denn doof», sait d Celine vo hinde.
«He waisch was, mr hälfe euch do öbbis z finde.
In däm Park gitts so vyl tolli Sache.
Mir dien euch grad e baar Vorschleeg mache.
Wie wärs in Russland bi dr Euro-MIR?»
«Ych waiss nit, das wär dängg zimlig dyyr.»
«Oder in Spanie bim Reschtorant Don Quichotte,
Das wär doch sicher au no flott.
Bim Fluech vo dr Kassandra in Griecheland,
Au das wär ganz sicher allerhand.
Waisch wie, in Öschtrych bim Alpe Express?
Dr ganz Daag Zügli fahre ohni Stress.
In dr Schwyz bim Matterhorn Blitz,
Gitts in dr erschte Raihe äxtra Sitz,
Und im Schällen Ursli Huus, ych wett,
Hetts sicher au no zwai freyi Bett.
In dr Walliserstube öbbis dringge und ässe,
Dört könnet ihr euer Laid e bitz vergässe.
Und sunscht halt ganz öbbis Neus,
Ins Königrych vo de Minimoys.
Im Abentüürland do gitts e Flooss,
Das fahrt mit euch dur e Dschungel – famoos.
Im Grimms Märliwald in Wichtelhuuse,
Im Läbkuechehuus zur Abwäggslig pfuuse.
Und sunscht in Irland im Kinderland,
Bim groosse Spiilplatz, hetts e Kaschte mit Sand.»
«Jo waisch», saage die zwai Pirate bedroffe,
«Jetzt sinn mr scho so lang dur dä Park do gloffe.
S isch alles toll und mir dangge euch alle,
Am liebschte wurd uns halt scho e Pirateschiff gfalle.»
Do kunnt dr Celine e Bombe Idee:
«He jo, in Portugal han ych doch so ains gseh.
Das wär doch öbbis so für dr Momänt,
Und immer no besser als neume dusse im Gländ.»

E Batavia Fan vo Pfaffeweiler kunnt grad entgeege.
«Hallo zusammen, liebe Freunde und Kolleege,
Ich sammle Unterschrifte für die Pirate von Batavia,
Dass me des alles wieder neu aufbaue kaa.»
Die ganz Familie hett e Riisefreud do draa:
«Loos, unseri Unterschrifte kasch grad haa!»
«Beschter Dangg, des find y ganz toll,
Mei Unterschrift-Blatt isch jetzt scho voll.
Dem Neuaufbau steht somit nix im Wege,
so könne mir die Traditione weiter pflege.»
D Kinder und d Pirate-Kids mache e Riiselärm
Und falle enander glügglig in d Ärm.
«Hey, ihr Pirate, mir mien jetzt langsam wider haim,
Und ihr hänn jo au bald wider e neus Dehaim.
Also machets guet und glaubet fescht dra,
Mir kömme euch ko bsueche – im neue Batavia.»