Vereinigty Kryyse Bewältiger

Basel steggt in grosser Noot
Mir saage jetzt wos duure goot!

Die schönschti Stadt, das merggt me glyy,
das ka doch numme Basel syy!
Bewunderet vo alle Lütt,
das isch doch wirgglig mee als nüt.
En Erfolgsgschicht ganz e irri,
globbt vo Timbuktu bis uf Ziiri.
Und d Basler, so hänn mir das gleert,
sinn uff dr ganze Wält begeert.
So het me bis vor kurzem kenne
Basel s «Non Plus Ultra» nenne.
Laider isch das alles umme,
mir Basler sin, kurz gsait, die Dumme.
Me muess es wirgglig nümm bewyyse
Basel erläbbt die schlimmschti Gryyse.
In däre Stadt gits nüt me z lache,
dr Letscht ka grad no s Liecht usmache.
Byspiil solle illustriere,
wie me z Basel duet regiere.
Me seet denn wos duet aanefiehre
und dass mir uns nur no blamiere.
D Mäss Schwyz, dr Stolz vo unsre Babbe
duet nonem letschte Suurstoff schnabbe.
Basel World liggt schynts im Stärbe,
das trotz intensyvem Wärbe.
Au d Waremäss, losst me jetzt hange,
es sinn nur no zwai Bsuecher gange.
Au d Muba isch Vergangehait,
d Mässelaitig hett das gsait.
Well d Mässelandschaft andersch tiggt,
hett me dr Kamm in d Wieschti gschiggt.
D Mäss isch nit dr ainzig Schregge
wo me z Basel ka entdegge.
Au d BVB es isch zem gruuse,
schiesst d Millione nur so uuse
und so wie d Drämmli fahre dien
ergerisch di blau und grien,
denn d Schiine bröösmele wie Sand,
dr Diräggzion fählts an Verstand.
Und s Personal het d Nase voll,
die finde s Schaffe au nümm toll.
Ai Skandal folgt uf dr näggscht,
wytter goot das so im Täggscht.
Dr FCB, hett friehner gfalle,
hütt stollbre si nur über d Balle.
D Clublaitig wo nit vyyl verstoot,
wär e Sääge wenn si goot.
Au d Uni kame bald begraabe,
si rutscht im Ranking als me aabe.
Wells Baselbiet nümm zahle wott,
macht au s Theater bald bangrott.
D Barteie bringe au nüt z stand,
die händle nur no mitenand.
Bsunders schwach isch au d Regierig,
es fählt do anre ächte Fiehrig.
D Frau Ackermaa das merggt me glyy,
isch bim Regiere kai Genie!
Dr Cramer fallt au us dr Norm,
är kämpft no mit dr Schuelreform.
Dr Wessels ai Provokation
wartet nur no uff d Pension.
Dr Baschi isch go Tesla kaufe,
drum duet är sich jetzt d Hoor usraufe.
D Eva Herzog, kämpft wos goot
um e Blatz im Ständeroot.
Dr Brutschin luegt im Blaue Huus
dr ganzi Daag zem Fänschter uus.
Engelsbergers Hauptgebiet
isch flirte mit em Baselbiet.
Mit där Regierig, s isch z verstoo
muess Basel jo dr Bach ab goo.
Bevor sich d Stadt komplett duet wandle
mien mir jetze dringend handle.
Drum gründe mir jetzt e Bartei
und mache Basel wiider frei.

VEREINIGTI KRYYSE BEWÄLTIGER

Mir Altgardischte VKB
rette Basel, wärdets see.
Das, trotz Glasaug, falsche Zeehn
und Kney wo nümme grad us geehn.
Mir wooge jetz dä schwiirig Aggt,
denn s hett is s Rettigsfieber paggt.
S Barteiprogramm e Glanzidee,
isch unsre Stolz das wird me see.
Zerscht muess d Regierig Fädere loo,
d Regierigsrööt wärde entloo.
d Grossrööt dien mir pensioniere,
mir könne ohni die regiere.
Denn dien mir s Roothuus uusemischte
vo Lingge, Griene, Sozialischte
und baue us däm Mausoleum
s erscht Regierigsroot Museum.
Mir hängge an die leere Wänd
Vo dr Regierig Gegeständ.
Vo dr Ackermaa d Gitarre
Vom Baschi Dürr e Tesla Karre
Vom Brutschin no e alte Stumpe
Vom Morin sone Aazug Lumpe
Vom Cramer d FCB Krawatte
Vom Wessels nur dr aige Schatte.
Im Räscht vom Huus, das wär nit dumm
kunnts Zolli Ozeanium.
S Bartei Programm hilft au extrem
bim lööse vo Verkehrsproblem.
Mir dien für alli Parkplätz baue,
glaini für uns, grossi für d Fraue.
D Schugger dien mir kommandiere
zum Verkehrsschild abmontiere.
Au d Liechtsignal kömme ewägg
die hänn jo ainewääg kai Zwägg.
Mir schigge s Bläch no USA
dr Trump kaas für sy Muure ha.
Schiine wärde uusegrisse,
s Theater brucht si als Kulisse.
Drämmli griege denn d Bulgaare,
au wenn die gar nit Drämmli faare.
Rollbänder gits denn in dr Folgg
in dr Stadt fürs ganze Volgg.
Für d Schütteler vom FCB
hänn mir au e Glanz-Idee.
S Erscht wo mir dien unternää,
jedem e aigni Balle gää,
drzue e Kompass und e Brülle,
no duet sich s Stadion wiider fülle.
Und s Netz vom Gool kunnt vorne draa,
so spaare si dr elfti Maa.
Ihr seehnt s Bartei Programm das stoot
und zeigt wos künftig duure goot.
Wotsch Mitgliid wärde, mäld di aa,
lüt in d Bartei Zentraale aa.