MARIO KART LIVE: AM PRO INNERSTADT HUUSEGGE-RENNE

Zerscht hänn schyynt s d Binggis allem aa,
glaub an däm Sujet Gfalle gha,
doch laider hänn si gar nyt gfunde,
was cool isch, s Niveau syg z wyt unde.
In som e Kart mit Frinde starte
syg ebbis fir e Kindergarte
und in däm Kaare erscht no drampe,
do liess me alles glyy lo lampe.
Si hänn das Sujet falle lo
und im e Dail e Gfalle do
vo uns, das syg nit biirewaich,
hett s ghaisse, au kai irre Saich.
Drum wänn s die grosse Binggis ha.
Si luege s nit als Minggis aa
und brenne druff als Naare-Stare,
e Renne mit däm Kaare z fahre,
statt uff dr Route umme bummle
mit pfyffen und mit numme drummle.

Zwai wo kai Gspass am fahre hänn,
hänn Angscht (und drum kai Kaare wänn),
s wurd wägem Ranze au mit zwänge,
in som e Dail dr Blatz nit länge.
Dr Aint will still, statt drampe, chille,
dr Ander lieber d Lampe fille.
S maint Aini: mit däm dumme Kaare
mecht ych nit wirgglig umme fahre.
Y hoff, dass me begryffe ka,
dass ych meh Fraid am pfyffe ha.
Anstatt bim drummle numme schwitze,
mit em e Go Kart umme flitze,
isch cool, dänggt Ain, doch kasch nit seh,
wie s wär, wenn s Glattyys hätt mit Schnee.
Wenn s uff dr Route Neegel git,
y nimm glaub lieber d Schlegel mit.

Die wo nit wänn go Renne fahre
und sich dä Kaare kenne spaare,
sin angaschiert als Streggeboschte,
zem Strau in scharfi Egge moschte,
denn au zem d Route zer Zyt butze,
zem ummestoh und zem nyt nutze.

E Tambourmajor bruucht s do kaine,
doch mir hänn ainewääg no aine,
wo zwor muess iiber d Glinge springe,
s sett ohni Bängel schwinge glinge
und au ganz ohni Märsch aasaage.
Do hett är wohrschyynts no draa z gnaage.
Är hett au s Gfiehl, es wurd em stingge,
käm är am Cortège nit zem wingge.
Wenn alli wo im Kaare sitze
und au scho vor em fahre schwitze,
baraad sin zem mit drampe starte
und vor dr rote Lampe warte,
kan är sy Kompedänz lo walte
und s Liecht vo rot uff grien go schalte.
Doch nur wenn kaini Kinderwääge
im Wääg sin und bi Wind und Rääge
no sehsch, wo s Zyyl isch – (s wär au schlau,
wenn d frooge kenntsch: wo hett s gnau Stau?),
wird s Renne gstartet, gnaadeloos
und schnäll, doch wär dr Schaade grooss,
wenn scho bim starte d Schwarte krache
und vyyl, s wär hart, kai Fahrt me mache.

Doch das, was mir uff d Rolle schiebe
und mit de Kart de tollen iebe,
isch e Computerspiil, nit meh
mit zimmlig wenig Stiil persee,
wo s fimfezwanzig Johr scho git.
Vyyl Grips bruuchsch, das isch wohr, do nit.
Doch in däm Kart dur d Altstadt flitze –
als Mario, wänn mir glatt nitze,
zem schnäll die Gaischterstadt z verschregge
und nit nur e Debatte z wegge,
nai, wel mir au s Besträäbe hänn,
dass mir die Stadt belääbe wänn.

Mir dien is au nit schwär drmit,
nit nur am Cortège, s wär e Hit,
mit dääne Gfährt duur d Gasse z brause,
denn glasse zmitts dur s Nasse z sause
und au um d Eggen umme z längge.
Doch e Verbot rundum z verhängge
wär dumm, denn die Bolide hänn
kai Tangg, wel mir vermyyde wänn,
dass d Bolizei, denn s bstoht do d Gfohr,
maint s syg en Auti mit Motor
und was denn au nit muess bassiere
isch, dass mir drum e Buess kassiere.
Drum drampe mir mit runde Rugge,
fir Stunde ohni Grund sich z drugge.
Mir drampe so zem gfalle numme,
nit wie dr Trump uff allen umme.

S git no vyyl meh, wo drampe wänn,
doch sälte z nacht e Lampe hänn,
wo brennt, au s Schlussliecht hinde nit.
Wel s vyyl vo dääne Blinde git,
wo ainewääg so Velo fahre,
ka me dr Kommentar do spaare.
Au Farbeblindi fahren umme,
drnääbe sin mir glaar die Dumme,
wel mir bi Rot im Kart mien warte,
bis s grien wird und erscht denn dien starte.
Doch wenn die Velo-Rowdies wänn
d Verbot umgoh und s Gaudi hänn –
und erscht no d Bolizischte denne
broblemlos iiberlischte kenne,
so sin mir zimmlig naarefrei
bi unsrer Altstadt-Fahrerei.

Es isch e ganz nei Spiil im Handel,
Mario Run, im Stiil e Wandel,
im Trend, denn s liggt fir jeede dinne,
es ka schyynt s au e Bleede gwinne.
Mir gehn drum s näggscht Johr mit de Kart
am Cortège sicher nit an Start.
Mir seggle, s finde s d Spinner glatt,
als Mario dur d Innerstadt.