20 JOOR DOLLY - Gloone ka sich loone

Dass d Schotte ihri Schotteröggli
mit Kittel und de gschtriggte Söggli
wäbe und au strigge kenne,
um dermit dur d Highlands z renne,
bruuchts, das liggt glaub uff dr Hand,
e huffe Schoof im ganze Land.

Doch well me nit nur Wulle scheert,
sondern au ihr Flaisch begeehrt,
wo me denn uff alli Arte
in Beize findet uff de Karte.
Als Irish Stew und Haggis Gricht,
(won e normale Mensch erbricht).
Das ässe die in rauhe Mänge,
dien do dermit denn d Schoof verdränge.

Bis hütte isch es dääwääg gloffe:
het e Schoof e Schööfin droffe,
mache die mitnand e Schlööfli
und do drus gits denn jungi Schööfli.

Laider sinn, so wird hüt gsait,
d Schoof zum Koitus nimm berait.
D Böck blööke nur für ihre Fraass,
wänn mit dr Schööfin nimm ins Graas.
Well hüt d Natur nimm Noowuggs schafft,
bruucht me halt jetzt d Wisseschaft.

In Edinburg do gits e UNI,
was die denn gmacht hän, hai do stuun y.
Mit ’re Zälle us em Utter
und mit Hilf vo drey Computer,
wird schnäll e Söösli zämme griert,
doch laider isch denn nüt bassiert.
Um s Ganze wiider z aggtiviere,
duet me im grosse Stiil brobiere
mit Knätter, Schüttler, Autoklave,
mit Filter und Chromatographe,
Pipette, Analyser, Laser
und jeedi Mängi Laborgleeser,
au Whisky bruchts no mit vyyl Malz,
Süüry, Lauge und au Salz.
Denn wird alles kondensiert,
gschüttlet, gschmolze, oxydiert
und kurz bevor s Ganz explodiert,
isch s groosse Wunder denn bassiert.
E rächte Schoof-Cloon isch entstande
und plötzlig zmitts im Labor gstande.
Vor luter Freud nennt me das tolli
Schoof vo Aafang aa grad Dolly.

Die ganzi Wält het Aadail gnoo,
sogar im Färnseh isch es ko.
Me losst e huffe Zäpfe knalle,
so lang bis alli Forscher lalle.
Der Ogi Dölf isch denn dr Erscht,
wo schrybbt, dass grosse Freude herrscht.
Au der Pabscht duet graduliere,
är hofft, drum duet s ihm imponiere,
me kenn gly Buschi produziere
ohni miesse z kopuliere.

Au d VKB mecht profitiere,
foot aa do driiber no z studiere.
Me het vo däm Erfolg vernoo
und isch denn uf d Gedangge koo,
dr fählend Noowuggs so z ersetze,
dermit die leere Böschte z bsetze.
Me het denn schnäll e Aadraag gstellt,
Pfyffer, Drummler z Schottland bschtellt.

Laider hänn si d Laborfläsche
überhaupt nit suuber gwäsche.
Dä Gloonversuech und jetzt muesch loose,
gooht denn am Schluss total in d Hoose.
Drum lauft jetzt d Clique, das isch s Dumme
halt mit grosse Schoofsköpf umme.

D Schotte hänn ab uns nur glacht,
mit gloone fröhlig wyter gmacht.
Jetzt forscht me scho syt zwanzig Joor
und waiss es wär e z grossi Gfoor.
Me duet s drum gar nümm usbrobiere,
Mensche afoo z produziere.
Und s Labor het, hän mir erfahre,
zum Glügg e Selektionsverfahre,
wo politisch, gaischtig minderi
Hirni gloone grad verhinderi.
Wo wurdi das au aane goo,
kenntsch aifach Mensche gloone loo.
Me stell sich vor das wurdi glinge
und s wurde fufzig Heino singe
oder hundert Blocher schwätze,
das wär für alli sicher s Lätze.
Au wenn zwanzig Wessels Heere
alli wurde Stroosse speere.
Au kaini gloonte Behring wämmer,
das wär für Basel nur e Schämmer.
Ganz glunge wär der FCB
wenn elf Embolo wurdsch see.
Gloont me d Ackermaa am Änd,
het s Roothuus e Gitarre Bänd.
S Ainzig wo für mi wurd haue,
e Ainhaitstyp vo schöne Fraue.

Stoppe mir die Experimänd,
denn s gäb für alli e schlimm Änd.
Bschtimmt vergiengt denn uns au s Lache,
wenn d Buschi nümm kennsch sälber mache.

Mir hänn doch scho in Bio gleert,
es so wie s isch, isch s nit verkeehrt.
S Lääbe startet ghaimnisvoll,
ganz im Glaine aifach toll,
In ’re Zälle in ’re klainere,
mängmool ändet s au in ainere!