Bisch sicher sicher?

Bisch sicher, dass de sicher bisch?
Die Froog liggt hütte uff em Disch.
D Statistik soll ys drum bewyyse
bi Sicherheit do gits kei Gryyse.
Doch d Wirggligkeit, s isch allerhand
seht anderscht us, es isch e Schand.
Wotsch Znacht in d Stadt, denn hesch kei Wahl,
de muesch di schütze, s isch e Qual.
E Weschte, schuss- und stichfescht, draage,
Sturzhoose, gmacht us fufzää Laage,
Ellboogeschoner und e Helm,
so merggt denn au dr gfährligscht Schelm,
do gits nüt z hole dä isch gschützt
und wenn das alles au nüt nützt,
gits nur ei Uswääg ganz ellai,
gosch nümm uf d Gass, blybsch schöön dehai.
Unsrer Regierig wurd das basse
und d Schugger kennte zoobe jasse.
S wär plötzlig alles schön und still,
so wies d Statistik zeige will.
In dr BAZ muesch denn nümm lääse,
dass hirnlos, kriminelli Wääse
am Rhybord ein vermöblet hänn,
im Drämmli aim sy Handy wänn.
Bim Seiby wo e Maa sich buggt,
ihm ein e Dolch in Rugge druggt.
E Paar wo schmuust am Claraplatz
bikunnt vo hinde ein an Latz.
Gfährlig ischs bi Bruggepfyyler,
dert hogge nämmlig all die Dealer
wo Kügeli verkaufe wänn
und Mässer in de Pfoote hänn.
Me seht si kuum wenn s denn bassiert,
die sinn drum maxi-pigmentiert.
So Gwalt gits nit nur am e Frytyg,
me liist s bald all Daag in dr Zytyg
und vyyl stoht gar nümm in däm Blatt,
denn niemerts findet das no glatt.
Begegnet dir e Burka-Gschtalt,
weisch nit isch dört drunter Gwalt.
Villicht will die, es wär jo megli,
au nur go bädele im Egli.
D Regierig, wo sott öbbis mache,
beschäftigt sich mit andre Sache.
S isch schliesslig wichtiger, hejoo,
für jede Mischt e Gsetz z erloo.
Dr Geri Lips gryfft au nit yy,
denn bi me Ringkampf dänggt dä glyy
es isch doch aifach wunderschöön,
wenn sich zwei Männer so verstöön.
S Unagnähmi hänn scho d Ahne
verschwinde loo, irgendwo aane.
Das git mir jetze d Gläägeheit
zrugg zluege in d Vergangeheit.
Gwalt hett sy Ursprung scho ganz frieh,
duet sich bis hütte duure zieh.
Scho Höhlemensche hänn schyns gstohle,
sinn ohni z frooge vyyl go hoole.
Hänn Hiehner und au Fraue gmuggt,
sich denn in Höhle schnäll verdruggt.
Bestohleni sin mit vyyl Gschrey
uff d Diebe loos, ei Schleegerey.
Hänn so sich d Hiehner wider gnoo,
nur d Fraue hänn s ne überloo.
Au s Mittelalter isch nit frey,
es git e mänggi Glopferey.
Dangg Panzerig vo Kopf bis Fuess,
wo jede Ritter draage muess,
gits trotz Gwalt in Gottes Gnaade
nur am Bläch e glaine Schaade.
Sehr kämpferisch sinn d Eidgenosse,
die hänn e huffe Bluet vergosse,
bi Kämpf und Schlachte überall,
e schlimmi Zyt uff jede Fall.
Und denn die Grieg in neuschter Zyt
bringe Leid für sehr vyyl Lyt.
Bi so vyyl Gwalt, es isch zem gruuse,
ka me gar nümm richtig pfuuse.
Gwalt gits oft au nur im Gleine,
guet versteggt, das isch s Gemeine.
Scho Buschi bysse voller Luscht
ihrem Mami als in d Bruscht.
Dr Käsperli mit synre Küüle,
haut em Groggodil e Büüle.
Oder dängged an die Brätscher,
wo Fliege dööde mit so Dätscher
und au Veganer, s isch e Schand,
köpfe Salat und das vo Hand.
Drum finde mir s wär an der Zyt,
dass unseri Regierigslyt
sich Znacht emool in Stroose wooge
und hoffentligg, es isch nit glooge,
au e mol vo Lumpepagg
(am beschte grad im Doppelpagg)
beraubt und überfalle wärde,
vo so Gwalt verherrlichende Härde.
Sicher wurd der dürri Baschi
nümme nur so Wischiwaschi
über d Sicherheit verzelle
und sich de wohre Sytte stelle.
Paggt ein dr Baschi vor me Laade,
nimmt wenigschtens d Frysuur kai Schaade.
Am Frytyg ka das nit bassiere,
do duet är nämligg Wösch sortiere.
Nit nur d Menschheit, nei au d Gwalt
pflanzt sich furt und macht kei Halt.
Drum schlöön mir vor, me sotts brobiere,
d Kinderstube neu z lanciere.
Wenn alli ihre Kinder lehre,
me ka sich ohni Gwalt au wehre,
no hätte mir scho sehr vyyl gwunne
und denne schynt für alli d Sunne.
Denn sott me nur no duuregryffe
bi alle wo das nit begryffe.
Miesst Gwaltbereiti, wo falsch tigge,
am beschte grad in d Wieschti schigge.
Mir träume wyter ohni Halt,
von ere Gsellschaft frey vo Gwalt.