Voll im Bild

Wenn de friener vo dir hesch e Fotti gmacht,
hesch „Cheese“ gsait und in d Linse glacht
vom Fotograaf, wo zerscht professionell
s Liecht het gmässe an dr Stell,
wo de gstande bisch mit dym braite Grinse,
denn mit zweenig Liecht wär s Bild in d Binse;
är het dr Blitz au yygstellt bi Bedarf,
am Objektiv drait, bis de scharf
hesch ussgseh uf däm Fotteli
und nit verschwumme wie-n-e Dotteli.
Hit goot, dasch aigetlig sympathisch,
die ganzi Sach vollautomatisch,
bruuchsch kai Fotograaf meh, kai Kamera,
muesch aifach nur e Natel ha,
das hebsch vor dy Gsicht und druggsch uf s Knepfli
und scho hesch e Selfie gmacht vo dym Kepfli.
Doch ass den Applaus kriegsch vo de Kollege,
muesch scho guet dir iberlege,
an weelem Ort und zue weelere Stund
und vor weelem Hintergrund
de das Bildli machsch und uf weeli Wyys
den uffalle kasch um jede Bryys, 
eb bim Sinnele am Palmestrand,
bim Extremsport im Bärner Oberland,
bim Suffe vom-e-ne Bier us Hopfe
oder mit Stars, wo dir uf d Schultere klopfe.
Muesch toll usseh und jung und frisch,
au wenn de nimm de Jingschti bisch,
und duet s di nit geniere,
kasch au fiidleblutt posiere,
denn je dimmer de duesch, dasch s Glatte dra,
deschto greesseren Erfolg wirsch ha.

Wenn dy Gsicht dir nit so gfallt,
machsch e Selfie vo dym Fiidle halt:
Muesch aifach d Hand nach hinde stregge
und s Hinter so in d Heechi regge,
ass d Spalte gnau vor em Natel liggt,
drzue hesch d Bai in de Kney lyycht gniggt,
und zem s Ganze no perfäggt z zentriere,
sottsch vor em Knipse kontrolliere,
ass d Symmetrie vo baide Bagge stimmt,
wil das em Bild dr Raiz sunscht nimmt. 
Doch hesch Ibergwicht und entspricht dy Form
in punkto Ussmaass nit dr Norm,
und isch s Fuudi z brait, denn due nit wild:
Mach aifach e Panoramabild!

Wäm e gweehnligs Fotti nimme gniegt,
wil är drvo kai Kick meh kriegt,
dä macht sy Keerper styff und starr
und leggt sich so total bizarr
elai oder mit e baar Kumpane
woogrächt schwäbend neymen aane,
wo-n-är in dääre Pose steert 
und iberhaupt nit aanegheert:
uf e neye Bürotisch,
ins Zolliaquarium zmitzt in d Fisch,
uf em Mafiaboss sy Luxuskarre,
uf e Motorrad bym freyhändig Fahre,
iber e Gletscherspalte oder au
in d Sauna mit em Chef syner Frau.
Das Bild wird denn uf Facebook poschtet,
au wenn s aim d Stell und d Gsundhait koschtet.
Planking haisst das und bsunders isch dra:
Erfunde hänn sy’s in Kanada.
Dä Drang, sich wie-n-e Brätt z verstyffe,
kasch psychologisch so begryffe,
ass die wie Brätter usseh wänn,
wil sy au vor ihrem Kopf ains hänn.

S git Lyt, die bruuche’s no vyl wilder,
die blöffe mit bewegte Bilder;
fir die git’s d Go-Pro-Kamera,
die schnallt me sich an d Stirnen aa
und filmt drmit nach Härzensluscht
und ohni Riggsicht uf Verluscht
alles, was vor dr aigene Nase
passiert, wenn me duet ummeraase
uf Velo, Snowboard oder Ski,
Hauptsach, s isch schnäll und hesch Spass drby. 
So het zem Byschpyl aine welle
e Mountainbike-Rekord ufstelle:
Är fahrt dr Hang ab wie nit ganz bache
und duet drvo e Video mache,
wo syny Heldetat dokumentiert
und allne zaigt, zue was ass es fiehrt,
wenn so-n-e Sportler im Ibermuet
sy Hirni dehai vergässe duet.
Syny Spring sinn, zuegäh, spektakulär,
doch s Lande fallt ihm zimlig schwär,
är straift e Tanne, iberschloot sich brutal,
und d Rega fliegt ihn denn ins Spital:
D Bai sinn broche und au s Gnigg isch nimm hail,
aber s Filmli im Youtube isch megagail. 
En andere seesch in den Alpe
wyt wäg vo dr Pischte dr Schtaiss uf tschalpe,
denn dert, wo s gfährlig isch und verbotte,
findsch laider immer eso Idiote,
wo filme mit heggschtem Risiko
zem im Internet e „Like“ z bikoo.
Dä fahrt uf de Ski denn bolzegrad
bi-m-ene Gfäll vo sibzig Grad
dr Stailhang aabe, das Kamuff,
und d Kamera nimmt alles uf.
Är macht e Salto, ganz e tolle,
und bringt e Schneebrätt so ins Rolle,
wo-n-är am Änd denn drunter kunnt:
Jetzt suecht ihn dr Lawinehund.

Me frogt sich, wo das no aane fiehrt,
wenn hit bald jede sich fotografiert
oder filmt drby, wie-n-är Mieh sich duet gää,
sich ganz ohni Hemmig drnääbe z benää,
und statt die pyynlige Bildli z verstegge
im ene Kaschte im hinterschten Egge,
verbraitet är sii im Internet,
wil dr ganze Wält är zaige wett,
wie toll är isch und iberhaupt,
was är so alles sich erlaubt. 
Das isch so Mode und liggt im Trend,
denn jede will, ass me-n-en kennt,
und vo ihm schwätzt, egal wyyso,
und syny Selfies „liked“ und d Video.
S isch glyych, wie hohl ain isch und dumm,
im Internet fyylt är sich s Maximum. 
Do kasch nyt mache, au wenn’s dir nit gfallt,
denn die Sälbschtdarsteller verkerpere halt,
dr wohry Gaischt vo unserer Zyt:
E Huffe Pixel und drhinter nyt.