Bsoffe! Vorwärts! Marsch!

Am erschte Mai, dasch Tradition,
het bi uns die ganz Nation
e Daag lang frey, ass alli Lyt
sich frooge mien, wie me die Zyt,
wo me vom Staat het gschänggt bikoo,
meegligscht sinnvoll z doot ka schloo.
Als Sozi lauft me stramm im Schritt
nadyyrlig an dr Demo mit,
duet yyffrig rooti Fahne schwinge,
die Internationali singe,
und loost vier Stund lang ohni z sitze
Reeden aa vo Gwärgschaftsfritze.
Bisch unpolitisch oder rächts,
findsch Demonschtriere ebbis schlächts, 
denn kasch au nur im Garte hogge
oder e bitz in Wald go tschogge,
in d Baadi go dr Ranze grille
oder am Rhybord gmietlig tschille,
kasch im Museum Kunscht begaffe 
oder in Zolli zu den Affe.
S git vyyli Arte, wie die Alte
niveauvoll dien dä Fyyrtig gstalte,
doch mänggi Jungi, das muesch tschegge,
kasch mit so Sache nur verschregge,
wil dääne nämlig numme wohl isch,
wenn s Niveau hoch isch alkoholisch.

Drum dräffe sich am erschte Mai
z Ryynach uss zmidaag am zwai
vor em Gartebad e Huffe
Jungi, wo gärn Bier dien suffe,
zum ene Wettlauf, wo die Deppe
Harasse dur d Gegend schleppe
und ai Fläsche no dr andere
dringge während em Wandere.
Dr Birs entlang, so d Routewahl,
goht’s in s Grien-80-Areal.
Als Siiger wird am Änd prämiert,
wär dr Parcours absolviert
in schnällschter Zyt und ohni z raschte
und alles Bier sufft uss sym Kaschte.
Bim Zyylyylauf, dasch bsunders toll,
sinn d Fläsche läär und d Lampe voll.

S duet allerdings die bsoffe Horde
im Vollrusch zimftig iberborde, 
denn bekanntlig schadet Gärschtesaft
im Iibermaass der Gaischteskraft,
und stygt dr alkoholisch Pegel,
wird au dr bräävschti Bursch zem Flegel.
S Bier gäärt und broodlet in de Ränze,
und das het beesi Konsequänze:
Mit Aalauf wirft ain, so wyt är maag,
sy Maageninhalt iber e Gartehaag;
so, wie dä dryyluegt, seesch däm Dotsch aa,
ihm fählt das Organ, wo den im Schädel sottsch ha.
En andere het sich nit lang bsunne
und macht in e Biotop e Brunne:
Das Rächt ka men ihm schlächt verwaigere,
denn Bier duet jo dr Harndrang staigere,
und s wär brutal, me wurd ihn zwinge,
mit voller Bloose wyter z springe. 
Zmitzt im Pflanzeschutzgebiet
rülpst ain s Baselbieterlied,
syny Kolleege finde’s e Hit
und gorpse „a capella“ mit.
En Alki mit ere Biergstanggfahne
schifft an e sälteni Bluemen aane,
die isch allergisch uff Toxin
und stirbt an eren Iiberdosis Urin.
Zwai Fiess luegen uss eme Busch uss:
Schlooft äggscht do ain sy Rusch uss?
Die maischte schwanggen oder laufe krumm,
und ab und zue keit ainen um,
in ere Kurve hängt ain in den Escht
und wyter vorne, das isch s Bescht,
sinn drey Bursche synchron am Bräche
(dr Gärtner darf s denn zämmeräche). 
S het Drunggebolde, die hänn guet
ebbe zwai Promill im Bluet,
womeeglig mien die Gselle denne
im Spital dr Rusch usspenne.
So duet dä primityyvi Huffe
sich hemmigslos ins Koma suffe.
Gfeschtet wird bis dief in d Nacht,
s wird gsoffe, kyfft, greelt und glacht
zue Muusigg uss em Ghettoblaaster…
Am näggschte Morge seesch s Desaster:
D Grien 80 liggt in Schutt und Äsche,
im Änteweiher schwimme Fläsche,
uff em Raase liigen Abfallbärge
und e baar kaputti Gartezwärge.
D Rächnig fir s Butze zahlt am Änd
d Migros, denn dääre gheert das Gländ.

Dr Gmaindroot z Ryynach git sich stuur,
ohni Verständnis fir d Jugendkultur,
und findet die Harasseschlepperey
aifach nur e Sauerey.
S git sottige, wo die Bierstafette
am liebschte grad verbiete wette,
doch anderi dääte s billige,
wenn me sy wurd bewillige,
aber nur, wenn men en OK bestimmt,
wo d Verantwortig ibernimmt.
Doch isch das nit en Illusion?
Verantwortig und Organisation
sinn Begriff, wo offebar
fählen im Vokabular
vo Lyt, wo glaube, s Greescht uff Ärde
syg in Rekordzyt bsoffe z wärde.

E Sprichwort sait, und das stimmt wohl:
Alkohol macht d Biire hohl!
Drum blybsch am beschte niechtern dehai,
wenn s wiescht zuegoot am erschte Mai.