70 Joor Alti Garde, au miir fyyre

Wenn mir d Setz mit "Waisch no ?" starte 
isch glaar: Es dien mir alte Gselle 
in uns'rer eedle Alte Garde 
vo friehner numme no verzelle.
Mir wüsse gnau, die beschte Dääg 
sinn ummen und verbyy;
Mir syyge - maine mir - no zwääg 
...doch das isch Nostalgyy...
Mir dien bi uns im Glyggekäller 
vor farbig-alte Helge, 
vor alte Larve, Fasnachtsdäller 
in däm, wo gsii isch schwelge.
Erfolgryych hämmer gruesst und pfiffe 
und sinn dur d Stroosse gfäggt, 
hänn persifliert und Väärsli gschliffe 
und so d Verainsgschicht prägt.
Mir hänn vyyl Goldmedaille ghoolt 
in dr Pfyff- und Drummelsparte, 
dr Konkurränz dr A... versohlt, 
wo die Junge no druff warte.
Graist simmer bis in d USA, 
Deep River und au Washington, 
hänn döört erfolgryych Uffdritt ghaa, 
im Innehoof vom Pentagon.

Hüt gpüürt me d Zaiche vo dr Zyt, 
mir pflääge s Faltegsicht;
E Dail vo uns isch nümm so fit, 
E baar hänn Ubergwicht.

Zwääg simmer no zem Jubiliere 
an cirka dausig Feschtli;
Mir dien uns sälber inszeniere 
mit Gescht und mit vyyl Geschtli.

Mir wänn vor allem d Fasnacht gniesse.
Mir zelle zue de "Mildere".
Und wie die drei Dääg mir begiesse, 
das wämmer doo kurz schildere:


Was gsehsch, wenn Stamm und Alti Garde 
und d Binggis und die Junge 
vom Alte Wartegg uus dien starte ? 
…s isch kurioos und "glunge":

Dramatisch wird s scho vor de Viere
wenn d VKB wott abmarschiere 
und zwanzig Alti Garde-Sogge 
no immer in dr Baiz dien hogge 
für döört sich geegesyttig z brichte 
die kummervollschte Granggegschichte.
Und was döört jeede z klööne hett, 
das glaubt kai Mensch, i mach e Wett:

Dr Eerscht sait: "Mi griegsch nit doo uuse, 
ich möcht in dääre Knille pfuuse !" 
E Pfyffer stöhnt, är miess kurz d Waade 
im Kneipp'sche Wunderwasser baade.
E Drummler schlieft mit Lyydensmyyne 
diskreet in d Gummi-Stützstrümpf yyne.
Ain sait, är wurd - doo gitt s nüt z lache - 
drotz Härzschrittmacher Fasnacht mache.
Und ain vom Vordraab ghöört me grööle, 
dass äär syy Hüftglängg no wott ööle.
En and're muess, drum duet är flueche, 
im Rootwyy d Zahnprotheese sueche.
E Wäägeler macht kurz und knapp 
scho vor de Vieri zimlig schlapp.
E Drummler macht sich an dr Hand 
e präventyyve Tape-Verband,
*Dr Waagechef kaa s nit verwinde 
und muess ganz kurz diskreet verschwinde.
Aer muess - uff Hoochdüütsch - no uff s "Näpfli" 
und steggt sich denn Beruhigszäpfli, 
doch denn verlosst är s Baize-Gländ 
...abgstützt uff Stäggen in de Händ.

Doch ainewääg git jeede Maa 
vyyi digger als dr ander aa.
E mängge vo uns alte Knaabe 
gsent bald numm uff syy "Wärggzüüg" aabe.
Ar sait zwoor, är bring nit nur gaischtig 
nai, au no sunscht e Super-Laischtig.
Doch wenn me d Frau diskreet duet frooge 
Denn merggsch, dr Maa hett zimlig glooge 
...will d Musggelgreft nit numme hinde, 
nai, laider - schyynt s - au vorne: schwinde.

Bim Yystoh dussen uff dr Strooss 
goht das Drama wiider loos 
will ain duet schimpfe: "Nundefaane, 
wo soll i mit mym Toupet aane ?
denn wenn das rutscht, denn isch s zem Gruuse
denn gsehn i nümm zer Larven uuse... 
und uus däm Grund denn - soon e Saich - 
my Drummle vor mir nümme braich".

Was uns aber sehr vyyl nützt 
isch d Jugend, wo uns unterstützt.
Die hilft uns engagiert und keck 
und reschpeggtiert uns alti Segg.
Si duet für unsere Altersreige
Verständnis und Vernunft uns zeige 
und wäggslet mit vyyl Sympathyy 
in uns're Höörgräät d Batteryy.
Denn kömmen au no d Binggis z gumpe 
und dien uns Alte d Rollstiehl pumpe.

Soo wärde mir lang wyter lääbe, 
dangg uns re Junge und em Stamm.
Me gseht uns, so hänn mir s Besträäbe, 
no ganz vyy! Joor lang nit im "Lamm" ! 
...und wenn s in Fasnachts-Himmel goht, 
wird unser Comité 
e Glygge gseh vo altem Schroot. 
und das isch: D VKB!