O sole mio!

Friidlig zieht am Nordpool oobe 
e glainen Yysbäär syyni Runde;
Ar kaa döört nümm lang ummetoobe 
und gniesst die letschte kalte Stunde.
Aer isch no sainzig Exemplaar 
wo druurig ummelungeret;
Syy Mammen isch, s isch unfassbaar, 
vor Wuche scho verhungeret.
Jetz hett dää häärzig Syydebolle 
halt effektyyv nur no s Besträäbe:
Im Paggyys uff er e kalte Scholle 
so lang wie mööglig z überlääbe.

D Chance stöön für ihn nit guet 
wenn mir so wyter mache;
Ar frogt sich drum in groosser Wuet 
ob d Mensche nie verwache ?
S verregge d Meer, d Luft wird zerstöört 
und groodet wird dr Wald;
Und wenn me nit uff d Waarnig höört 
verlauft syyYys au bald.

...und s Yys vom Bäär, däm glaine, stolze 
isch beraits e bitzli gschmolze

Derbyy gitt s wältwyt Konferänze 
in Bali und in Kyoto;
nur zieht me kaini Konsequänze, 
denn s goot döört noon em Motto, 
dass anderi zeerscht solle spaare, 
vor allem zeerscht die Inder 
und schliesslig au d Chinese-Schaare 
und vo den Inder d Kinder...

D Lüüt fliegen yy per Düüse-Jet, 
S dänggt niemer an Planeet;
Si laabe sich an Fescht-Banggett 
...vo Umwältschutz? - Kai Reed !

In Bali wird denn diskutiert 
im klima-gschützte Saal;
S wird gschlemmt und gsürpflet und diniert.
S Ergääbnis ? - Minimaal !
S hänn alli zwoor die glyychy Mainig:
S waar höggschti Zyt zem handle, 
Wil s Klimaa - und me isch sich ainig - 
sich Daag für Daag duet wandle.

...doch am Nordpool zimlig gschwind 
schmilzt s Yys vo unserem Baarekind...

Dr Bush, dr Boss vo USA, 
Isch s grööschte Risikoo;
Nur isch dä Maa z Amerikaa 
vyyl z blööd für das z verstoo.
Jetz wünscht me sich, s haig bald en Änd, 
Doch d Hoffnig isch rächt kiehn, 
denn au bim näggschte Presidänt 
wird s Wysse Huus kuum grien.

Doch halt emool. Sinn miir perfäggter ?
Isch Gryttig denn erlaubt?
Und handle miir emänd korräggter ?
Säälig isch, wäär s glaubt !

Dien miir nit au - nur zem Vergniege - 
e Mini-Uusflug mache 
und "numme gschwind" in Süüde fliege 
per Jet, mit dausig "Sache" ??

...doch s Yysfäld, wo dr Bäär druff sitzt, 
schwitzt und schwitzt und schwitzt und schwitzt..

Miir schmaisse Drägg in d Atmosphääre 
(für daas hänn miir Talänt);
Und d Art, wie mir uns dien ernääre 
isch au rächt dekadant.
D Riebli dien mir z Spanie hoole 
S Wintergmies wänn miir im Mai;
Die dummi Gans, die kunnt uus Poole 
Und d Spaarse kömmen uus Hawaii.
Kiwis uus em Färnen Oschte, 
Uus Costa Rica d Ananas;
Uns isch es Wurscht, was das duet koschte, 
S wichtigscht: S macht em Gaume Spass.
Denn hoole miir per Dyyselschlitte 
bim näggschte Begg am Egge:
Drei Schwööbli, zwai Studänteschnitte 
und löhn uns die lo schmegge.
Per Helikopter uff dr Gipfel 
per Ski im Diefschnee dur d Natuur, 
verbyy an tyynstaub-gschwechte Wipfel 
Umwälttächnisch: "Schwachsinn puur".

...und däm Bäärli uff em Yys 
gohts unterdesse wirgglig myys

Syt d Mensche sich e Dryybhuus baue, 
Wird s Joor für Joor noo wermer;
Und wil MIR d Umwält dien versaue 
die Arme noo vyyl ermer.
Kai Stroom wird gspaart, kai Energyy 
in Wärggstett und in Beize 
und - syg s privaat, syg s Industryy - 
mir dien au vyyl z fescht heize.
Maischterhaft dien miir s verdränge 
S isch nit sehr yytallsryych;
Für UNS wird d Luft woorschyynts no länge, 
doch d Zuekumpft isch uns glyych.

Stimmt nit ! Jetz simmer alarmiert.
Mir wänn jetz besser wärde;
Dr Drägg wird sofort reduziert 
im Sinn vo uns'rer Aerde.

S wäär höggschti Zyt...ah nai, s isch z spoot 
Denn uns'ren Yysbäär isch jetz doot...