s Riiserad im Glaiformaat

Wenn d Bäum ihr Summerglaid verliere 
und s Martinsglöggli d Mäss yylüttet 
und wenn dr Bell duet Würscht grilliere, 
denn wüsse mir, was das bedüttet:

Denn duet s im Heerbscht an alle Egge 
und in de Stroosse vo dr Stadt 
no Moggedaigg und Nougat schmegge 
und Grooss und Glai die finde s glatt.

Machsch uff em Münschterplatz e Bsiechli 
driffsch aine, wo dr Lukas haut;
Und nääbem Stand mit Roosekiechli 
e Kind, wo wacker Pizza kaut.

Gsehsch s Riiseraad im Liechterglanz
Wo s Stadtbild dominiert;
Mit Lämpli und vyyl Firlefanz, 
mit Schwyzerfäänli dekoriert.

Und d Muusig, wo ans Ohr duet fluete 
spiilt „z Basel an mym Rhyy", 
Soo, ass me sofort muess vermute:
Döört miesse Schwyzer syy.

Bis jetz döönt alles rächt harmoonisch 
und s hett e Huuch vo Nostalgyy, 
Wobyy jo das e bitz e Hohn isch, 
Denn s hett nütz due mit Harmonyy.

Me merggt: Doo isch nit alles guet, 
S wott nit zer Herbschtmäss basse, 
denn ain sitzt mit em e Bayern-Huet 
als Wysswurscht an dr Kasse.

Uus Büxe suufft är Löwenbräu 
in Lääderhoose, bruune !
Für uns'ri Mäss isch das ganz neu 
und bringt uns sehr zem Stuune.

D Präss schrybt, es haig e Bürogummi 
däm Düütsche s Reedli doo erlaubt.
Mir stelle d Froog drum, ganz e dummi, 
ob ihm das wirgglig öbber glaubt?

Denn duet au dr Regierigsroot 
no d Meedie informiere;
Dr Mann" blybt hart" und wird nit root 
und duet s nit dementiere.

Uff d Noofroog vo de Journalischte 
nach dr Hööchi vo däm Raad, 
hänn d Basler Herbschtmäss-Spezialischte 
die bassend Antwort scho baraat:

„S Riiseraad vo de Germaane 
das bassi halt im Geegesatz 
zem Schwyzer Fahrgschäft besser aane 
als Bliggfang für dr Münschterplatz.
Und zuedäm isch es grad so grooss 
und riisig, fascht gigantisch;
Doch s schöönscht am Raad, das isch famoos 
Es isch au seeeehr romantisch".

Doch wo me s uffbaut uff dr Aerde 
merggt me, ass das gar nit stimmt, 
will s Reedli nit wott gröösser wärde 
...was me schpööter eerscht vernimmt..

Derbyy hett vor nit langer Zyt 
ain soon e Hoochraad poschtet;
Är bruucht derzue e Bangg-Kredyt 
will soon e Fahrgschäft koschtet.
S isch aine, wo oft z Basel wohnt 
und aine, wo me z Basel kennt;
Und ain, wo Joor für Joor wie gwohnt 
doo z Basel d Stüüre brennt.

Dä bangt jetz um syy Existänz 
und isch drum zimlig hässig;
Aer wott bim Gricht en Audiänz, 
denn sehr vyyl isch rächt gschpässig:

Wie hett dr „Paapscht vom Spiegelhoof" 
das Wysswurscht-Raad bewilliget ?
Wieso hett druff sy Chef im Schloof 
da Vorschlaag au no billiget ?

Denn s Amt hett sich bim Riiseraad 
cirka um zwölf Meter g irrt;
Jetz stoht döört ains im Glaiformaat, 
doch trööschtend isch: Das lauft wie gschmiirt.

S Wort „schmiire", wo mir doo verwände 
stoht doo ganz unterschwellig, 
denn dass me schmiirt in Form vo Spände 
wäär glaar en Unterstellig.

Nai, z Basel, doo wird nit bestoche 
Doo fliesst kai Provisioon !
Doo wird nüt geege Gäld versproche 
Doo gitt s kai Korruption !
Vo Schmirgäld duet doo niemer reede, 
für Bschiss gitt s doo kai Gläägeheit.
Und doo in Basel weiss das jeede:
Mir kenne doo nur Ehrligkait.

Bestächig kennt me z Basel nit, 
Mir dörfe dorum froh sy;
Wäär Standplätz geege Gäld vergitt, 
ghöört zue de Mafioosi.

Im Amt für Mässe, Dienscht und Määrt 
sinn d Lüüt uus eedlem Holz:
Drum simmer uff dä achtbaar Wäärt 
als Basler Burger stolz.

Und lauft das Raad au das Joor rund, 
denn sinn miir nit verwirrt;
Mir kenne jo dr Hintergrund:
Das Reedli lauft ...wie gschmiirt…