Mir alli wünschen uns im Lääbe gueti Karte. Und ganz vyyl Trümpf. Dää Wunsch goot für uns VKB-ler in Erfüllig am
PLAUSCH-JASS vom Samschtig, 21. Septämber 2024
im Käller vom Stammverein
Dräffpunggt: 1330 h, Start: 1400h
Dr Yysatz isch 10 Frangge, aber jeedi/jeede bringt en originelle Bryys im Wäärt vo ebbe 10 Frangge mit.. Dr Fantasyy sinn kaini Gränze gsetzt. Die eerschte Drei griegen aber e Bon im Wäärt vo. ...Frangge. Loss Di überrasche...
Gspiilt wärde die vier Trumpffarbe, Undenuffe und Oobenaabe, aber ohni Slalom. Mir spiile 5 Durchgäng; Nach 3 Durchgäng git's e...
...Verpfläägigs-Pause. S git für die, wo sich drzue aagmäldet hänn, e Wurschtsalat für 10 Frangge. Denn git's au no Kääskiechli, Flammekueche und Brätzel.
Als Ehrerbietig für unser VKB-Gründigsjoor wärden in jedem Durchgang 1884 (!!!) Pünggt vergää. Alli Jassende notiere nach jedem Durchgang ihri uusegjasste Pünggt und löön sich die uff em Standblatt geegesyttig vo dr Geegnerschaft visiere, d.h. mir bruuche kai Rächnigsbüro.
Gjasst wird an siibe Tisch; mitmache dien also die 28 Jass-Begaischterte, wo sich zeerscht, aber bis am 10. Septämber aagmäldet hänn.
Und noo öbbis Wichtigs: Alli spiile ohni Egge-(ab), aber mit vyyl Häärz, s isch aber e Plausch und es soll friidlig syy. Eventuell geegesyttigs Zämmeschysse wird ohni Vorwarnig diräggt mit er e Roote Karte bestrooft.
Aa- und Abmälde duesch Di am beschde ganz aifach über fragab:
https://fragab.com/8B9J2rJj
Mir wünsche alle Jassende vyyl Vergniege und e Noomidaag lang rächt gueti Karte.
Als VKB-Plauschjass-OK laaden yy
dr Dieter Cattelan und dr Peter Marrer
Deelifoon für eventuelli Frooge